بەشێ کیمیایا پزیشکی سەرەدانەکا زانستی بۆ قوتابیێن قۆناغا پێنجێ ل کۆلیژا دەرمانسازی بۆ ڕێڤەبەریا ژینگەها دهۆکێ ڕێکخست، ل ڕۆژا یەکشەمبی ڕێکەفتی ٢٣ێ شواتا ٢٠٢٥ێ، ب سەرپەرشتیا پڕۆفیسۆرێ هاریکار دکتۆرە نضال مينا شير محمد، مامۆستایا وانەیا شیکارکرنا دەرمانسازی یا ئامێری (Instrumental Pharmaceutical Analysis).

سەرەدانێ گەڕیانەکا ناساندنێ ب سروشتێ کارێ ڕێڤەبەریا ژینگەها دهۆکێ ب خۆ ڤە گرت، زێدەباری گەڕیانەکێ د ناڤ تاقیگەهێن زانستی دا بۆ ئاگەهداربوون ل سەر هەمی پشکنینێن تاقیگەهی و ئامێر و کەرەستەیێن دهێنە بکارئینان د ئەنجامدانا شیکارکرنان دا. هەر ئێک ژ بەڕێز حەسەن ڕەمەزان عەبدۆ و خاتوین بافرین ئەحمەد حوسێن ڕوونکرنەکا هویر و پێزانیێن گرنگ ل سەر وان پشکنینان پێشکێشکرن یێن کو ل سەر نموونەیێن ژینگۆیی یێن جودا دهێنە ئەنجامدان، دگەل میکانیزما کارکرنا ڤان ئامێران و چەوانیا سەرەدەریێ دگەل وان بۆ مسۆگەرکرنا ب دەستڤەئینانا ئەنجامێن بڕوەپێدای.

ئەڤ سەرەدانە بوو دەلیڤەیەکا نموونەیی بۆ گرێدانا د ناڤبەرا وانەیێن تیۆری و لایەنێ کرداری (پراتیکی) دا، و تێگەهشتن ل سەر بنەمایێن کارکرنا ئامێرێن پێشکەفتی وەک: ئامێرێ کڕۆماتۆگرافیا شل یا خودان کارامەییا بلند (HPLC)، و کڕۆماتۆگرافیا گازی (GC)، و پێڤانێ تەخا تیشکی یێ بڵێسەیی (Flame photometry)، و تیشکپێڤانێ مێژەیا ئەتۆمی (Atomic absorption spectroscopy)، و مەودایێ جێبەجێکرنا وان د بیاڤێ دەرمانسازیێ دا.

ل دوماهییا سەرەدانێ، شاندا ئەکادیمی و قوتابیان سوپاسی و ڕێزگرتنا خۆ بۆ ڕێڤەبەرێ ڕێڤەبەریێ بەڕێز دلشاد عەبدولڕەحمان و هەمی کادرێن کارگێڕی و تاقیگەهی دیار کر، بۆ پشتەڤانییا وان یا بەردەوام و هەماهەنگییا وان یا ب مفا د ناڤبەرا ڕێڤەبەریا ژینگەها دهۆکێ و کۆلیژا دەرمانسازی ل زانکۆیا دهۆکێ.